बोस्टन । अध्यागमन तथा भन्सार प्रवर्तन (आइस) ले म्यासाचुसेट्सको बोस्टन क्षेत्रमा गरेको कारबाहीको क्रममा १,४०० भन्दा बढी कागजपत्र बिहिन आप्रवासीहरू पक्राउ परेका छन् ।

प्याट्रियट २.० नाम दिएको यो अपरेशन सेप्टेम्बर ४ देखि ३० तारिखसम्म सञ्चालन गरिएको थियो। मे महिनामा राज्यमा गरिएको पहिलो अपरेशन प्याट्रियटमा १,४६१ भन्दा बढी मानिसहरूलाई हिरासतमा लिइएको बताइएको छ।

आइसले बिहीबार जारी गरेको एक विज्ञप्तिमा भनिएको छ, ‘गत महिना म्यासाचुसेट्समा पक्राउ परेका १,४०६ कागज पत्र बिहिन आप्रवासीहरू मध्य ६०० भन्दा बढीमाथि संयुक्त राज्य अमेरिकामा गरिएका अपराधहरूको लागि महत्वपूर्ण आपराधिक अभियोगहरू वा विचाराधीन आपराधका आरोपीहरु थिए ।’

विज्ञप्तिमा भनिएको छ, ‘पक्राउ परेकाहरूमध्ये छ जना अन्तरराष्ट्रिय आपराधिक गिरोहका सदस्यहरू थिए भने अरू धेरै गिरोह सहयोगी थिए,” । “पक्राउ परेकाहरूमध्ये तीन जना परिचित वा शंकास्पद आतंकवादी थिए।’

आइसका अनुसार पक्राउ परेकाहरूमा ग्वाटेमालाका २४ वर्षीय एन्डरसन स्टीफन हर्नान्डेज-भास्केज पनि थिए, जसले बाल बलात्कारको आरोपमा वोबर्नमा दुई वर्ष जेल सजाय भोगेका थिए।

ब्रिस्टल काउन्टीमा स्वैच्छिक हत्याको लागि सजाय भोगेका केप भर्डेका ४२ वर्षीय नागरिक मारियो अगस्टो लोपेस-बारोस र म्यासाचुसेट्समा फेन्टानिल र अन्य लागूऔषध राखेको आरोपमा खोजीमा रहेका डोमिनिकन गणतन्त्रका २९ वर्षीय वेलिंग्टन एरिस्टीलाई पनि हिरासतमा लिइएको आइसीईले जनाएको छ।

अर्को घटनामा, सेप्टेम्बर १२ मा मिलफोर्डमा १६ वर्षीय किशोरलाई आइसले हिरासतमा लिएको थियो तर उक्त किशोरलाई पछि रिहा गरिएको थियो ।

स्मरण रहोस म्यासाचुसेट्सका गभर्नर मौरा हेली र बोस्टनका मेयर मिशेल वू दुवैले ट्रम्प प्रशासनको आप्रवासन नीतिहरूको आलोचना गर्दै आएका छन्।