काठमाडौँ । एन्फा राष्ट्रिय लिगमा फ्रेन्ड्स क्लबले सात खेलपछि जित हासिल गरेको छ ।

सोमबार बिहान १० बजे त्रिपुरेश्वरस्थित दशरथ रङ्गशालामा सम्पन्न खेलमा फ्रेन्ड्सले श्री भगवती क्लबलाई २–० ले हरायो । फ्रेन्ड्सका लागि मिडफिल्डर प्रशान्त लक्समले गोल गरे । एक गोल फ्रेन्ड्सले आत्मघाती उपहार प्राप्त गर्‍यो । निर्धारित समयको अन्तिम मिनेटमा भगवतीका विवश चौधरीले आफ्नै पोस्टमा गोल गर्न पुगेका थिए ।

फ्रेन्ड्सले आफ्नो पहिलो खेलमा काँक्रे बिहार क्लबसँग ३–१ को पुनरागमन जित हासिल गरेको थियो । त्यसयता ७ खेलमा फ्रेन्ड्सले जित निकाल्न सकेको थिएन । जितसँगै ९ खेलमा ९ अंक जोड्दै फ्रेन्ड्स १०औँ स्थानमा उक्लिएको छ ।

भगवतीले पछिल्लो खेलमा काँक्रे बिहारलाई नै ६–० ले हराएको थियो । तर, ६ दिनको ब्रेकपछि सोही लयलाई भगवतीले कायम राख्न सकेन । समान खेलमा ८ अंक जोडेको भगवती १३औँ स्थानमा झरेको छ ।

अर्को खेलमा एपीएफ फुटबल क्लबलाई राष्ट्रिय लिगमा प्लानिङ बोइज युनाइटेडले रोकेको छ ।

त्रिपुरेश्वरस्थित दशरथ रङ्गशालामा सोमबार सम्पन्न खेलमा एपीएफ र प्लानिङले १–१ गोलको बराबरी खेल्दै अंक बाँडेको छ । एपीएफको यो तेस्रो बराबरी हो । लिगमा ९ खेल खेलेको एपिएफको २१ अंक जोडेको छ ।

प्लानिङको यो चौथो बराबरी हो, उसको १० खेलबाट १९ अंक छ । २२औँ मिनेटमा कप्तान युवराज खड्काको गोलमा एपीएफले सुरूआती अग्रता लिएको थियो ।