बैंकक। कम्बोडियामा अलपत्र परेका १६ जना नेपाली नागरिकको उद्धार गरी स्वदेश फर्काइएको छ । 

कम्बोडियामा अवैध रूपमा सञ्चालित अनलाइन स्क्यामिङ केन्द्र र क्यासिनोमा अनलाइन ठगी लगायतका गैरकानुनी काममा लगाइएका तथा बिनाभिसा बसिरहेका उनीहरूलाई नेपाली राजदूतावास, बैंकक र कम्बोडिया सरकारको सहयोगमा उद्धार गरी आज स्वदेश फर्काइएको नेपाली राजदूतावास बैंककले जनाएको छ ।

मानव तस्करको प्रलोभनमा परी विभिन्न माध्यमबाट कम्बोडियामा अलपत्र परेका वा कठिन परिस्थितिमा रहेका अन्य नेपालीहरूलाई समेत नेपाल फर्काउने पहल भइरहेको राजदूतावासले जनाएको छ ।

यसैगरी, नेपाल सरकारले तोकेको मापदण्डबमोजिम श्रम स्वीकृति लिएर मात्र वैदेशिक रोजगारीमा जान तथा कसैको प्रलोभनमा परी छिटो र धेरै पैसा कमाउने लोभमा कम्बोडिया, लाओस, म्यानमार, थाइल्याण्ड लगायतका मुलुकमा भ्रमण भिसामा रोजगारीका लागि नआउन नेपाली राजदूतावास, बैंककले अनुरोध समेत गरेको छ ।