काठमाडौँ । नवनिर्वाचित सभामुख डोलप्रसाद अर्यालले सदन प्रतिपक्षको हो भन्ने मान्यताका आधारमा आफूले भूमिका निर्वाह गर्ने बताउनुभएको छ ।

सिंहदरबारस्थित कार्यकक्षमा आज पदभार ग्रहणपछि सञ्चारकर्मीहरूसँग संक्षिप्त प्रतिक्रिया दिनुहुँदै सभामुख अर्यालले सदनमा प्रतिपक्षको आवाजलाई यथोचित स्थान दिन आफूले सधैँ भूमिका खेल्ने बताउनुभयो ।

यस पटकको निर्वाचन अन्य समयको भन्दा नितान्त भिन्न भएको उल्लेख गर्नुहुँदै सभामुख अर्यालले अहिलेको सबैभन्दा बलियो प्रतिपक्ष भनेको नेपाली जनता नै भएकाले जनताको अभिमत अनुसार सदनले काम गर्ने पनि बताउनुभयो ।

सभामुख अर्यालले कानून निर्माण गर्ने मुख्य कार्यभार पुरा गर्नेगरी सदनलाई प्रभावकारी रुपमा सञ्चालन गर्नु आफ्नो अहिले प्राथमिकता रहेको पनि बताउनुभयो ।

यसअघि नवनिर्वाचित सभामुख अर्यालले आजै राष्ट्रपतिको कार्यालय शीतल निवासमा आयोजित एक समारोहमा राष्ट्रपति रामचन्द्र पौडेल समक्ष पद तथा गोपनीयताको शपथ ग्रहण गर्नुभएको थियो ।