मौन भए पनि बोलिरहे जस्तो

अव्यक्त मनका भावना खोलिरहे जस्तो

मनमोहक ‘गौरीशङ्कर’ प्रति

कृतज्ञ भावमा श्रद्धा प्रकट गरेर

सत्यम्, शिवम्, सुन्दरम् गाए जस्तो

थुम्का थुम्काको सँगालो

सयौँ लुङको सुन्दर शैलुङ

स्वर्गको आभास बोकेको

अलौकिक चमत्कार जस्तो ।

परिशुद्ध आत्माले नैसर्गिक

श्रद्धा बोके जस्तो

विनम्रताले अहङ्कार त्यागेर

ज्ञानको ढोका खोले जस्तो

भूत, वर्तमान र भविष्य

सधैँ एक भए जस्तो

न लोभ छ ?

न लाभ छ ?

न विलाप नै गर्छ ?

ईश्वरीय भाव बोकेर

प्रतिक्षण आनन्दित

बोधीसत्व भेटे जस्तो

थुम्का थुम्काको सँगालो

सयौँ लुङको सुन्दर शैलुङ

स्वर्गको आभास बोकेको

अलौकिक चमत्कार जस्तो ।

टुङुना र डम्फुको तालमा

गुम्बामा माने घुमाउँदै

च्याङ्वा र मैँच्याङले

तमाङ सेलोमा पिरती गाए जस्तो

चौँरी डुलाउँदै

मायाको गुराँस चुल्ठोमा सजाएर

‘गौरीशङ्कर’ जोडी बाँधे जस्तो

न आस छ ? न त्रास छ ?

आत्मनिरीक्षणमा मुग्ध छ !

समभावमा प्रफुल्ल छ !

स्वर्गानुभूतिमा ध्यानावस्थित भए जस्तो

थुम्का थुम्काको सँगालो

सयौँ लुङको सुन्दर शैलुङ

स्वर्गको आभास बोकेको

अलौकिक चमत्कार जस्तो ।