लस एन्जलस । ट्रम्प प्रशासनको तेस्रो देश निर्वासन कार्यक्रम अन्तर्गत संयुक्त राज्य अमेरिकाले चर्चित अपराधी भनेर सार्वजनिक गरिएका पाँच आप्रवासीहरूलाई अफ्रिकी राष्ट्र इस्वाटिनी पठाएको गृह सुरक्षा विभाग (होमल्याण्ड सेक्युरिटी)ले मंगलबार जनाएको छ।

सर्वोच्च अदालतले कुनै सम्बन्ध नभएका देशहरूमा मानिसहरू पठाउने प्रतिबन्ध हटाएपछि अमेरिकाले पहिले नै आठ जनालाई अर्को अफ्रिकी देश दक्षिण सुडानमा निर्वासित गरिसकेको छ।

सामाजिक संजाल एक्समा पोस्ट गर्दै होमल्याण्ड सेक्युरिटी सहायक सचिव ट्रिसिया म्याकलफ्लिनले पुष्टि गरेकी छिन्, ‘इस्वाटिनीमा पठाइएका पाँच जना भियतनाम, जमैका, क्युबा, यमन र लाओसका नागरिक हुन् ।’

उनले भनेकी छिन्, ‘स्वाटिनीमा पठाइएका पाँच जना दोषी प्रमाणित भएका अपराधी थिए । तिनीहरु बर्बर थिए कि तिनीहरू जन्मिएको देशहरूले तिनीहरूलाई फिर्ता लिन अस्वीकार गरे।’

ट्रिसिया म्याकलफ्लिनले जोड दिएर भनिन्, ‘तिनीहरुले अमेरिकी समाजलाई आतंकित पारेका थिए । तिनीहरू सबै दोषी ठहरिएका अपराधी थिए र यति अनौठा र बर्बर थिए कि तिनीहरू जन्मिएको देशहरूले तिनीहरूलाई फिर्ता लिन अस्वीकार गरे।’

म्याकलफ्लिनका अनुसार तिनीहरु हत्या र बलात्कार लगायतका अपराधहरूमा दोषी ठहराइएका व्यक्ति थिए र एक जना पुष्टि भएको अपराधिक गिरोहको सदस्य थियो।

यद्यपि इस्वाटिनीमा पठाइएका पाँच जनालाई जेलबाट निर्वासित गरिएको थियो वा अध्यागमन कार्यहरूमा हिरासतमा राखिएको थियो भन्ने कुरा सार्वजनिक गरिएको छैन।

इस्वाटिनी सरकारले बुधबार एक्समा पाँच जना कैदी भनेर सम्बोधन गरेको छ र इस्वाटिनीको सुधार गृहको फरक फरक स्थानमा राखिएको पुष्टि गरेको छ।

सामाजिक संजाल एक्स मार्फत इस्वाटिनी सरकारले भनेको छ, ‘अमेरिकाले यसलाई सहज बनाउन संयुक्त राष्ट्र संघको आप्रवासन एजेन्सीसँग सहकार्य गर्नेछन्। यसले स्वदेश फिर्ती प्रक्रियाको रूपमा व्याख्या गरिएको मानव अधिकारको सम्मान र पालना गरिएको सुनिश्चित गर्ने छ।’