काठमाडौँ । सरकारले आसन्न प्रतिनिधि सभा सदस्य निर्वाचनका लागि चिन सरकारद्वारा प्रदान गरिने ४ मिलियन अमेरिकी डलर बरावरको आर्थिक सहायता स्वीकार गर्ने निर्णय गरेको छ ।

प्रधानमन्त्री तथा मन्त्रिपरिषदको कार्यालय सिंहदरबारमा आज बसेको बैठकले फागुन २१ गतेको निर्वाचनलाई लक्षित गर्दै तीन दिन सार्वजनिक बिदा दिने निर्णय गरेको गृहमन्त्री एवं सरकारका प्रवक्ता ओमप्रकाश अर्यालले जानकारी दिनुभयो ।

मन्त्रिपरिषद्को बैठकले निर्वाचनका लागि फागुन २०,२१ र २२ गते सार्वजनिक बिदा दिने निर्णय गरेको छ ।

यस्तै मन्त्रिपरिषद् बैठकले चालू आर्थिक वर्षको विनियोजित बजेटमा उल्लेख भएबमोजिम बुढिगण्डकी जलाशययुक्त जलविद्युत आयोजनाको वित्तीय लगानी ढाँचा स्वीकृत गर्ने निर्णय भएको प्रवक्ता अर्यालले बताउनुभयो ।

गृहमन्त्री एवं सरकार प्रवक्ता अर्यालले काठमाडौँ जिल्ला अदालतको जिल्ला न्यायाधीश डा.दिवाकर भट्टलाई उपभोक्ता अदालत काठमाडौँको अध्यक्ष तोक्ने, वि.स २०८३ सालभरि दिइने सार्वजनिक बिदाहरू निर्धारण गर्ने निर्णय भएको जानकारी दिनुभयो ।

यस्तै मन्त्रिपरिषद् बैठकले जेनजी परिषद् गठन गर्ने पनि निर्णय गरेको प्रवक्ता अर्यालले बताउनुभयो ।