डडेल्धुरा । नेपाली कांग्रेसका पूर्वसभापति तथा पूर्वप्रधानमन्त्री शेरबहादुर देउवा यस पटक प्रतिनिधिसभा सदस्य निर्वाचनमा मतदान गर्न गृह जिल्ला डडेल्धुरा नआउने निश्चित भएको छ।

निर्वाचन हुन अब सात दिन बाँकी रहँदा देउवा बुधबार राति स्वास्थ्य उपचारका लागि सिंगापुर प्रस्थान गर्नुभएकाे छ । उहाँले डडेल्धुराको गन्यापधुरा गाउँपालिका–१ मटेलास्थित असिग्राम मावि मतदान केन्द्रबाट प्रत्येक निर्वाचनमा मतदान गर्दै आउनुभएकाे थियाे।

देशभर निर्वाचन गतिविधि तीव्र भइरहेका बेला उम्मेदवारलाई विजयी गराउन देउवा गृह जिल्ला आउने, नआउने भन्ने अन्योल कायमै थियो। तर उहाँको सिंगापुर यात्रापछि यस पटक मतदानका लागि नआउने स्पष्ट भएको हो।

जेनजी आन्दोलन र विशेष महाधिवेशनपछिको अवस्थापछि देउवा सार्वजनिक रूपमा धेरै सक्रिय देखिनुभएकाे छैन। निर्वाचन र पार्टीको जितका विषयमा उहाँले हालसम्म कुनै सार्वजनिक अभिव्यक्ति दिनुभएकाे छैन।

नेपाली कांग्रेस डडेल्धुरा स्रोतका अनुसार स्वास्थ्य समस्याका कारण देउवा पार्टीको आमसभामा सहभागी हुने सम्भावना न्यून रहेको बताइएको थियो।

२०४८ सालदेखि २०७९ सालसम्म निरन्तर संघीय निर्वाचन लड्दै आउनुभएका देउवाको निर्वाचन क्षेत्र डडेल्धुराबाट यस पटक कांग्रेसका तर्फबाट नैनसिंह महर उम्मेदवार रहनुभएकाे छ।