काठमाडौँ । मलेसिया फुटबल संघ विश्व फुटबलको सर्वोच्च निकाय फिफाको कारबाहीमा परेसँगै एएफसी एसियन कप छनोटको तेस्रो चरणमा नेपालले तीन अंक पाएको छ ।

फिफा अनुशासन समितिको मङ्गलवार बसेको बैठकले फिफाको अनुशासन संहिता (एफडिसी)को धारा २२ को उल्लङ्घन गरेको भन्दै मलेसियालाई कारबाही गरेको छ । जसले गर्दा नेपालले अङ्कको खाता खोल्न सफल भएको छ ।

समूह ‘एफ’ अन्तर्गत गत जुन १० मा मलेसिया आफ्नो दोस्रो खेलमा भियतनामविरुद्ध ४–० को सहज जित हासिल गरेको थियो । क्वालालम्पुरस्थित बुकित जलिल नेशनल रङ्गशालामा सम्पन्न खेलमा घरेलु टोलीका लागि जाओ भिटर ब्रान्डाओ फिगुएरेडो, रोड्रिगो हुलियन होलगाडो, लरेन्स कोर्विन ओङ र डियोन कुल्सले गोल गरेका थिए ।

फिफाले होलगाडो र फिगुएरेडोसहित सात खेलाडीलाई कारबाहीको आधिकारिक मितिबाट १२ महिनासम्म फुटबलका गतिविधिबाट प्रतिबन्ध लगाउनुका साथै २००० स्विस फ्र्याङ्क ९३ लाख ५४ हजार ५३७ नेपाली रुपैयाँ० जरिवाना तोकेको छ । त्यस्तै मलेसिया फुटबल सङ्घलाई ३५ हजार स्विस फ्र्याङ्क ९६ करोड २० लाख ४४ हजार १४८ नेपाली रुपैयाँ० जरिवाना लगाइएको छ ।

गत सेप्टेम्बरमा फिफा अनुशासन समितिले मलेसियालाई कारबाही सुनाएको थियो । त्यसपछि मलेसिया संघ र खेलाडीले १० दिनभित्र आफ्नो कारबाहीविरुद्ध अपिल समितिमा निवेदन दिन भनिएको थियो । अन्ततः ६ महिनापछि मलेसिया कारबाहीमा परेको हो । कारबाहीमा परेका एक जना खेलाडीले समूहको पहिलो खेलमा नेपालविरुद्ध गोलसमेत गरेका थिए । गत मार्चमा मलेसियाले नेपाललाई २–० ले हराएको थियो । दोस्रो गोल गरेका लरेन्स कोर्विन ओङ कारबाहीमा पर्ने खेलाडी हुन् । यसकारण नेपालले तीन अंक हासिल गरेको हो ।

नेपाल एसियन कप पुग्ने समीकरणबाट बाहिरिइसकेको छ । नेपालले मार्च ३१ मा लाओससँग खेल्दै प्रतियोगिताको अन्त्य गर्नेछ ।