मुगु। हिमाली जिल्ला मुगुमा लुकीछिपी यार्सागुम्बा संकलन गर्न गएका २५ जनालाई प्रहरीले नियन्त्रणमा लिएको छ ।

जिल्लाका विभिन्न यार्सा पाटन क्षेत्रमा अनुमति बिना प्रवेश गर्दै गरेका २५ जनालाई नियन्त्रणमा लिएर अनुसन्धान भइरहेको जिल्ला प्रहरी कार्यालय मुगुले जनाएको छ ।

प्रहरीका अनुसार बिहीबार मुगुम कार्मारोङ गाउँपालिकाका विभिन्न पाटन क्षेत्रमा जाँदै गरेका जुम्लाको पातारासी गाउँपालिका–१ र २ का एक बालिका सहित २५ जनालाई नियन्त्रणमा लिइएको हो ।

जिल्ला प्रहरी कार्यालय मुगुका प्रहरी नायव उपरीक्षक रविराज थपलियाले अनुमति बिना वन तथा पाटन क्षेत्रमा प्रवेश गर्ने व्यक्तिहरूलाई नियन्त्रणमा लिइएको बताउनुभयो । यसअघि पनि यार्सा चोरी गर्न जाने व्यक्तिहरूलाई पक्राउ गरी सम्झाइबुझाइ गरेर घर फर्काउने गरिएको उहाँले जानकारी दिनुभयो ।

यसपटक पक्राउ परेकाहरूलाई जिल्ला प्रहरी कार्यालयमा ल्याएर बयान लिने काम भइरहेको प्रहरीले जनाएको छ । उनीहरूलाई हाजिरी जमानीमा छोड्ने तयारी समेत गरिएको छ ।

हालसम्म मुगुम कार्मारोङ गाउँपालिकाले यार्सागुम्बा संकलनका लागि आधिकारिक सूचना जारी गरेको छैन । पाटन क्षेत्र औपचारिक रूपमा नखुल्दै कोही पनि त्यतातर्फ नजान गाउँपालिकाले आग्रह गर्दै आएको छ ।

यार्सागुम्बा संकलनको समय नजिकिँदै जाँदा जिल्लाका पाटन क्षेत्रमा सुरक्षा व्यवस्था कडा बनाइएको छ । यो वर्ष पाटन कहिलेदेखि खुलाउने भन्ने विषयमा भने अझै निर्णय सार्वजनिक भएको छैन ।

मुगुका दुई दर्जनभन्दा बढी पाटन क्षेत्रमा पाइने यार्सागुम्बा संकलनका लागि हरेक वर्ष हुम्ला, जुम्ला, बाजुरा, कालिकोट, अछामलगायत जिल्लाबाट संकलक र व्यापारी आउने गर्छन् । यार्सागुम्बा दुर्गम क्षेत्रका धेरै परिवारका लागि मुख्य आम्दानी स्रोत मानिन्छ ।