काठमाडौँ । नेपाली कांग्रेसको विद्यार्थी सङ्गठन नेविसङ्घको अध्यक्षमा सभापति गगन थापा निकट करूणा कटुवाल मनोनित भएकी छिन ।

कांग्रेस सभापति गगन थापाले सोमबार धनकुटाकी कटुवाललाई नेविसङ्घ अध्यक्षको जिम्मेवारी दिएका हुन् ।

नेपाली कांग्रेस केन्द्रीय कार्यसम्पादन समितिको २०८३ वैशाख २१ गते सम्पन्न बैठकको निर्णय बमोजिम सभापति थापाले नेपाली कांग्रेसको विधान, २०१७ (संशोधन सहित)को धारा ४२ (१) (च) बमोजिम म्याद समाप्त भई स्वत: विघटन भएको सङ्घको अध्यक्षमा कटुवाललाई मनोनित गरिएको हो ।

अध्यक्ष कटुवाललाई तोकिएको समयभित्रै महाधिवेशन सम्पन्न गर्न ११ बुँदे कार्यादेश र कार्यविवरणसहित जिम्मेवारी प्रदान गरिएको विज्ञप्तीमा उल्लेख छ ।

कुनै समय देउवा र कोइराला समुहमा विभक्त नेविसङ्घ पछिल्लो समय देउवा र गगन समुहमा विभाजित छ र विद्यार्थीको मुद्धासंग साइनो र सरोकार नभएका नेता निकट बाहुबलीहरुको झुण्ड बन्दै आएको नेविसङ्घको नेतृत्व काँग्रेस भित्र पनि अलोकप्रिय संगठनको रुपमा परिचित छ ।

झन्डै दुई दशक देखि नेता अनुकुल मनोनित नेतृत्वको तर्दर्थवादमा चल्दै आएको नेपाली कांग्रेसको विद्यार्थी सङ्गठन नेविसङ्घको पटक पटक अधिवेशनको तिथि तोकिने तर निर्धारित तिथिमा नहुने पुरानो रोग हो ।