काठमाडौँ । चीनले लगातार दोस्रो हार बेहोरेसँगै नेपाली पुरुष क्रिकेट टोली एसियन गेम्सका लागि छनोट भएको छ ।

सिंगापुरमा भइरहेको छनोटमा चीन लगातार २ हारका साथ प्रतियोगिताबाट बाहिरिएपश्चात् नेपाल १ खेल अगावै प्रतियोगितामा सेमिफाइनल पुग्नुका साथै एसियन गेम्सका लागि छनोट भएको हो ।

पहिलो खेलमा नेपालसँग २२१ रनको फराकिलो अन्तरले पराजित चीन मङ्गलवार भएको दोस्रो खेलमा मलेसियासँग ९ विकेटले पराजित भयो । मलेसिया पनि नेपालसँगै एक खेल अगावै सेमिफाइनल पुग्दै एसियन गेम्सका लागि छनोट भएको छ ।

चीनले दिएको ८५ रनको लक्ष्य मलेसियाले ७.५ ओभरमा १ विकेट गुमाएर पूरा गर्‍यो ।

समूह चरणको अन्तिम खेलमा बिहीबार नेपाल र मलेसिया खेल्दै छन् ।