लस-एन्जलस । दक्षिणी क्यालिफोर्नियाका होम डिपोहरू आइस र संघीय एजेन्टहरूले कागज पत्र बिहिन मजदुरहरूलाई धर-पकड र पक्राउ गर्ने केन्द्रमा परिणत भएको छ ।

शुक्रबार लस एन्जलस क्षेत्रमा कम्तिमा दुई होम डिपो पार्किङ स्थलहरूलाई लक्षित गरि आइस र संघीय एजेन्टहरूले कागज पत्र बिहिन मजदुरहरूलाई धर-पकड र पक्राउ गरेका थिए ।

स्थानियले वारेन्टको माग गरेपनि उत्तरी हलिउड र अल्हाम्ब्रामा मजदुरहरूलाई हिरासतमा राखिएको थियो।

एक दिनको ज्याला कमाउने आशामा हरेक बिहान दक्षिणी क्यालिफोर्नियाका होम डिपोहरूको पार्किङ स्थलहरूमा ग्राहक कुरिरहेका कागज पत्र बिहिन मजदुरहरू कतिबेला धर पकड र पक्राउ पर्ने हुन् टुंगो हुदैन ।

आइस र संघीय एजेन्टहरू होम डिपो वरिपरि कागज पत्र बिहिन मजदुरहरूलाई पक्रने मौकाको खोजीमा कतै लुकेर प्रतिक्षा गरिरहेका हुन्छन ।

कागज पत्र बिहिन मजदुरहरूलाई पर्याप्त सूचना छ, होम डिपो वरिपरि आइस र संघीय एजेन्टहरू उनीहरुलाई पक्रिने मौकाको खोजीमा छन् तर परिवारको लालन पालन, घर भाडा र तिर्नु पर्ने बिलको चिन्ताले धर-पकड र पक्राउको चुनौती सहेर होम डिपोको पार्किङ स्थलहरूमा ग्राहक कुर्नु उनीहरुको नियति बनेको छ ।

एक कागज पत्र बिहिन मजदुर भन्छन, ‘ घरमै बस्न सकिन्न। बाल बच्चा, बिलहरू, भाडा, खानाको लागि पैसाको जोहो गर्न कामको खोजीमा निस्कनै पर्यो ।’

शुक्रबारको आइस र संघीय एजेन्टहरूले चलाएको होम डिपो अपरेशनमा ग्वाटेमालाका मजदुर रोबर्टो कार्लोस मोन्टोया भाल्डेजको मोनरोभियाको होम डिपोर्ट पार्किङमा एजेन्टहरूबाट भागेर मृत्यु भएको थियो। उनी नजिकैको फ्रीवेमा भागे र कारले ठक्कर दिएर मृत्यु बरण गरे ।

तर होमल्याण्ड सेक्युरिटी विभागले भने मोन्टोयाको मृत्यु हुँदा संघीय एजेन्टहरूले उनलाई पछ्याइरहेका थिएनन् भन्दै घटनामा आफ्नो संलग्नताबाट पन्छिएको छ ।

होम डिपोले पनि उनको मृत्युको बारेमा टिप्पणी गर्न वा उसको डिपोबाट कति गिरफ्तारीहरू भएका छन् भनेर भन्न अस्वीकार गरेको छ ।

होम डिपोले भनेकोछ, ‘हामीलाई आइस गतिविधिहरू हुनेवाला छन् भनेर जानकारी दिईएको छैन । हाम्रो सबै डिपोमा सबै संघीय र स्थानीय नियम र नियमहरू पालना गर्न आवश्यक छ।’