काठमाडौँ । नेपाली राष्ट्रिय महिला फुटबल टोलीकी कप्तान सावित्रा भण्डारी साम्बाले आफ्नो उपचारका लागि आर्थिक सहयोगको अपिल गर्नुभएको छ ।

कप्तान भण्डारीले आज सामाजिक सञ्जालमार्फत चोटका कारण पछिल्लो सात हप्तादेखि मैदानबाहिर रहनुपरेको जानकारी दिँदै आफ्नो घुँडाको पुनः जटिल शल्यक्रिया गर्नुपर्ने भएकाले आर्थिक सहयोगका लागि अनुरोध गर्नुभएको हो ।

भण्डारीले आफ्नो घुँडाको एसीएलमा यसअघि शल्यक्रिया गरेर हालिएको ग्राफ्ट र एमसिएल दुवैमा गम्भीर चोट लागेको जानकारी गराउनुभएको छ ।

यस्तै हाल न्युजिल्यान्डस्थित आफु आवद्ध क्लबले स्थानीय अस्पतालमै उपचार गराउन तयार रहेको जनाए पनि चोट गम्भीर रहेकाले कप्तान भण्डारीले उच्चस्तरीय उपचारका लागि कतारमा उपचार गराउने इच्छा सामाजिक सञ्जालमार्फत व्यक्त गर्नुभएको छ ।

भण्डारीको उपचारका लागि प्रारम्भिक रूपमा करिब ८० हजार अमेरिकी डलर खर्च हुने जानकारी समेत दिनुभएको छ ।

यस्तै कप्तान भण्डारीले सरकारी स्तरबाट पनि सहयोगका लागि पहल भइरहेको भए पनि प्रक्रिया अपेक्षाअनुसार अघि नबढेकाले आफूले आम समर्थकमाझ सहयोगको अपिल गर्नुपरेको उल्लेख गर्नुभएको छ ।