कञ्चनपुर । महाकाली नदीमा अविरल वर्षाका कारण पानीको बहाव लगातार बढ्दै गएको छ । आज बिहान १० बजे नदीमा पानीको बहाव १ लाख २८ हजार ५६० क्युसेक पुगेको थियो भने दिउँसो पानीको बहाव बढ्दै गएर १ लाख ८२ हजार ५५५ क्युसेक पुगिसकेको छ । यस कारण नेपाल भारत सिमानामा रहेको बनबासा पक्की पुलमा चार पाङ्ग्रे र तिन पाङ्ग्रे सवारी साधनको आवतजावत पूर्ण रूपमा बन्द गरिएको छ ।

कञ्चनपुर स्थित महाकाली नदीमा पानीको बढ्दो बहावलाई लक्षित गर्दै जिल्ला प्रशासन कार्यालय कञ्चनपुर र प्रहरीले यसबारे सचेतना जारी गरेका छन् । स्थानीय बासिन्दालाई सुरक्षित स्थानमा रहन र नदी नजिक नजान सुरक्षा निकायहरूले अनुरोध गरेका छन् । महाकाली नदीको बहाव अझै बढ्ने सम्भावना रहेकोले सम्बन्धित निकायले सतर्कता अपनाउन निर्देशन दिएका छन् ।