अमेरिका । अमेरिकाको जर्जिया राज्यस्थित लरेन्सभिलमा एक व्यक्तिले आफ्नै परिवारका चारजना सदस्यको गोली हानी विभत्स हत्या गरेका छन्। जर्जियाको लरेन्सभिलमा बसोबास गर्दै आएका ५१ वर्षीय भारतीय मुलका विजय कुमारले गएको शुक्रबार राति आफ्नै आफन्तहरूको हत्या गरेका हुन्।

घटनाको विवरण गुइनेट काउन्टी प्रहरीका अनुसार, विजय कुमारले आफ्नी ४३ वर्षीया पत्नी मिमु दोग्रा, ३३ वर्षीय गौरव कुमार, ३७ वर्षीया निधि चन्दर र ३८ वर्षीय ह्यारिस चन्दरको गोली हानी हत्या गरेका हुन्। शुक्रबार राति करिब २ बजे भएको यस घटनाले स्थानीय गुइनेट काउन्टी क्षेत्रमा ठुलो सनसनी फैलाएको छ।

विवाद र प्रारम्भिक अनुसन्धान प्रहरीको प्रारम्भिक अनुसन्धान अनुसार, एटलान्टास्थित आफ्नो घरबाट छोरासहित लरेन्सभिलमा रहेका इष्टमित्रको घरमा जाने क्रममा श्रीमान्-श्रीमतीबीच सामान्य मनमुटाव भएको थियो। सोही विवाद बढ्दै जाँदा विजय कुमारले आफन्तको घर पुगेपछि गोली चलाएको अनुमान गरिएको छ। लरेन्सभिलको उक्त घरमा उनका आफन्तहरू बस्दै आएका थिए।

बालबालिकाद्वारा प्रहरीलाई खबर घटनाका बेला घरमा रहेका तीन जना बालबालिकाले दराज (क्लोजेट) भित्र लुकेर आफ्नो ज्यान जोगाउन सफल भएका छन्। विजय कुमारका १२ वर्षीय छोराले तत्काल ‘९११’ मा फोन गरेर प्रहरीलाई घटनाबारे जानकारी दिएका थिए। उनीसँगै ७ र १० वर्षका अन्य दुई बालबालिका पनि लुकेका थिए।

सूचना पाएलगत्तै घटनास्थल पुगेको प्रहरीले चारै जनालाई मृत अवस्थामा फेला पारेको थियो। प्रहरीले तीनै जना बालबालिकालाई सकुशल उद्धार गरेको छ।

प्रहरी कारबाही प्रहरीले अभियुक्त ५१ वर्षीय विजय कुमारलाई नियन्त्रणमा लिई हिरासतमा राखेको छ। मृतकहरू र अभियुक्तबीचको थप नाता सम्बन्ध र हत्याको ठोस कारणबारे गुइनेट काउन्टी प्रहरीले गम्भीरताका साथ अनुसन्धान गरिरहेको छ।