लन्डन । पश्चिम लन्डनमा आइतबार आयोजित एक धार्मिक तथा सांस्कृतिक भेलाले त्यहाँ नेपाल कल्चरल सेन्टर स्थापना गर्ने निर्णय गरेको छ ।

भेलाले आगामी सन् २०२७ मा लन्डनमा पहिलो पटक भव्य आध्यात्मिक महोत्सव आयोजना गर्ने घोषणा समेत गरेको छ ।

कार्यक्रममा धर्म दर्शन सांस्कृतिक केन्द्रका संस्थापक पण्डित कुबेर सुवेदीले सनातन धर्म र संस्कृतिको संरक्षणका लागि बहुउद्देश्यीय सांस्कृतिक तथा आध्यात्मिक केन्द्र आवश्यक रहेको बताए ।

प्रमुख अतिथि एवं बेलायतका लागि नेपालका कार्यवाहक राजदूत विपिन दुवाडीले यो केन्द्र सम्पूर्ण समुदायको साझा सपना भएको उल्लेख गर्दै यसलाई नेपाली समुदाय अनुकुल बहुउद्देश्यीय बनाउन सुझाव दिए ।

त्यस्तै पण्डित नीलहरि घिमिरे र गुरु चिरञ्जीवी ढकालले समाज एकजुट भए मन्दिर निर्माणको सपना साकार हुने विश्वास व्यक्त गरे ।

कार्यक्रमका सभापति सहदेव गिरीले पशुपतिनाथ मन्दिर स्थापनाको अनुभव साझा गर्दै प्रस्तावित केन्द्रमा विभिन्न आध्यात्मिक गतिविधि, पुस्तकालय र क्यान्टिनको व्यवस्था गर्ने परिकल्पना रहेको जानकारी दिए ।

भेलाले नेपाली कल्चर सेन्टर यूकेको नयाँ संयोजकको जिम्मेवारी चिरन शर्मालाई सुम्पिएको छ ।