काठमाडौँ । जल तथा मौसम विज्ञान विभाग अन्तर्गतको मौसम पूर्वानुमान महाशाखाले आगामी तीन दिन उच्च पहाडी तथा हिमाली भू–भागमा भारी हिमपातको सम्भावना रहेको जनाएको छ।
महाशाखाले बुधबार साँझ जारी गरेको मौसम पूर्वानुमान बुलेटिन अनुसार मंगलबार राति कोशी, मधेस, बागमती र गण्डकी प्रदेशको थोरै स्थानमा मध्यम वर्षा र हिमपातको सम्भावना छ।
यसैगरी, बिहीबार र शुक्रबार कोशी र बागमती प्रदेशका उच्चपहाडी तथा हिमाली भू-भागमा अधिकांश बदली रही तराई भू–भागमा साधारणतया बदली रही एक–दुई स्थानमा भारी हिमपातको साथै कोशी, मधेस र बागमती प्रदेशका थोरै स्थानमा भारी वर्षाको समेत सम्भावना रहेको महाशाखाले जनाएको छ।
महाशाखाका अनुसार बंगालको खाडीमा विकसित चक्रवात ‘मोन्था’ मङ्गलबार राति भारतको आन्द्र प्रदेशमा प्रवेश गरीसकेको र तत्पश्चात् विस्तारै कमजोर हुँदै उत्तर–उत्तर पश्चिम दिशामा सर्दै आएको छ।
न्यूनचापीय क्षेत्रका रुपमा नेपालको मध्य भू–भाग नजिक आइ पूर्वतर्फ सर्दै बुधबार रातिदेखि कात्तिक १५ गते शनिबारसम्म नेपालको कोशी, मधेस, बागमती, गण्डकी र लुम्बिनी प्रदेशको मौसम प्रभावित हुने देखिएको महाशाखाले जनाएको छ।
