जनकपुर । मधेश प्रदेशसभामा रिक्त रहेको सभामुख पदका दुई जना प्रदेशसभा सदस्यको उम्मेदवारी परेको छ। 

मधेश प्रदेशसभा कार्यव्यवस्था परामर्श समितिको निर्णय अनुसार पुस ६ गते आइतबार हुने सभामुख पदको निर्वाचनका लागि तोकिएको निर्वाचन कार्यक्रम अन्र्तगत शनिबार दुई जनाको उम्मेदवारी परेको हो।

नेपाली कांग्रेससहित सात दलको समर्थनमा जसपा नेपाल मधेश प्रदेशका प्रमुख सचेतक राम अशिष यादव र नेकपा एमालेका प्रदेशसभा सदस्य त्रिलोकी प्रसादको उम्मेदवारी दर्ता भएको प्रदेशसभा सचिवालयले जनाएको छ।

जसपा नेपाल मधेश प्रदेशका प्रमुख सचेतक यादवको नेपाली कांग्रेसका प्रदेशसभा सदस्य विरेन्द्र प्रसाद सिंह प्रस्तावक रहनु भएको छ भने नेकपा (माओवादी केन्द्र)का प्रदेशसभा सदस्य फकिरा महतो समर्थक रहनु भएको छ।

त्यसैगरी नेकपा एमालेका उम्मेदवार त्रिलोकी प्रसादको नेकपा एमालेका प्रदेशसभा सदस्य शारदा देवी थापा प्रस्तावक रहनु भएको छ भने नेकपा एमालेकै प्रदेशसभा सदस्य जयचन्द्र प्रसाद पटेल समर्थक रहनु भएको छ।

आइतबार दिउँसो १ बजे बस्ने प्रदेशसभाको बैठकमा सभामुख पदका लागि निर्वाचन प्रक्रिया अगाडि बढ्ने प्रदेशसभा सचिवालयका सचिव बासु कोइरालाले जानकारी दिनुभयो।