काठमाडौं । नेपाली कांग्रेस पार्टीलाई एकताबद्ध बनाउने अभियानमा जुटेका नेताहरूको एक बैठकले आगामी वैशाख ६ गते आइतबार काठमाडौंमा बृहत भेलाको आयोजना गर्ने निर्णय गरेको छ ।

आजको बैठकमा पार्टीभित्र नियमित र विशेष अधिवेशन विवाद पछि उत्पन्न परिस्थिति र भर्खर सम्पन्न निर्वाचनमा नेपाली कांग्रेसको कमजोर प्रदर्शनको कारणका बारेमा समीक्षा गरिएको थियो।

काँग्रेस नेता विनोद कायस्थका अनुसार बैठकमा आगामी दिनमा देशमा उत्पन्न हुनसक्ने चुनौती , लोकतन्त्रको मर्म माथि नै हुनसक्ने सम्भावित प्रहार र त्यसको सामना गर्न सर्वप्रथम नेपाली कांग्रेस पार्टीलाई एकताबद्ध बनाउन देशभरका अगुवा कार्यकर्ताहरुले निर्वाह गर्नुपर्ने भूमिकाका बारेमा व्यापक छलफल भएको थियो।

सर्वोच्च अदालतमा विचाराधीन पार्टीको आधिकारिकता विवाद र अदालतको निर्णय पछि उत्पन्न हुन सक्ने परिस्थिति निरुपण गर्न चाल्नु पर्ने कदमका बारेमा बैठकका अधिकांश वक्ताहरुले चासो र चिन्ता व्यक्त गरेका थिए।

बैठकमा नेपाली कांग्रेसका नेताहरु विनोद कायस्थ, उनेशजङ्ग रायमाझी , पुष्प पराजुली , मोहन बराल , बालचन्द्र पौडेल, भुपेन्द्र थापा,बद्री अर्याल , रामकुमार मुल्मी ,नरोत्तम वैद्य, डा। मुक्तिराम श्रेष्ठ , कृष्ण थापा मगर, अन्जान लामा , देवी आचार्य , ध्रुव पाण्डे , देवी आचार्य ,राजन केसी, प्रेम जोशी , डा लक्ष्मीकान्त पौडेल , गोपाल विश्वकर्मा लगायतका वक्ताहरुले नेपाली कांग्रेस पार्टीलाई विभाजन हुन नदिन र पार्टीलाई एकताबद्ध बनाउन जिल्ला जिल्लामा सम्बाद र छलफल अगाडि बढाउन पर्ने विचार व्यक्त गर्नुभएको थियो।