काठमाडौँ । आईसीसी क्रिकेट विश्वकप लिग–२ अन्तर्गत घरेलु सिरिजको अन्तिम खेलमा नेपालले अमेरिकामाथि १२२ रनको शानदार जित दर्ता गरेको छ । त्रिवि क्रिकेट मैदान कीर्तिपुरमा शुक्रबार भएको खेलमा ३१८ रनको लक्ष्य पछ्याएको अमेरिका ४१ ओभर २ बलमा १९५ रनमा समेटिएको हो।

अमेरिकाका लागि सन्जय कृष्णमुर्तिले सर्वाधिक ५६ रन बनाए पनि टोलीलाई जित दिलाउन सकेनन् । शयान जहांगिरले २७, शेहान जयसुरियाले २६ तथा कप्तान शैतेजा मुक्कामुल्लाले २२ रन जोडे । नेपालका सन्दीप लामिछानेले उत्कृष्ट बलिङ गर्दै ३ विकेट लिए । दीपेन्द्रसिंह ऐरी, ललित राजवंशी र गुल्सन झाले समान २–२ विकेट लिए भने सोमपाल कामीले एक विकेट हात पारे ।

यसअघि टस हारेर पहिले ब्याटिङ गरेको नेपालले निर्धारित ५० ओभरमा ८ विकेट गुमाएर ३१७ रन बनाएको थियो । नेपालको इनिङ्समा इशान पाण्डेले ८४ रनको उत्कृष्ट योगदान दिए । उनले ८३ बलमा ८ चौका र १ छक्का प्रहार गरे । कप्तान रोहित पौडेलसँग उनले तेस्रो विकेटका लागि ११० रनको महत्वपूर्ण साझेदारी गरेका थिए । रोहितले ४६ रन बनाए ।

ओपनर आसिफ शेख र कुशल भुर्तेलले पहिलो विकेटका लागि ६९ रनको साझेदारी गर्दै नेपाललाई राम्रो सुरुआत दिलाएका थिए । आसिफले ४३ तथा कुशलले २९ रन बनाए । अन्तिमतिर दीपेन्द्रसिंह ऐरीले आक्रामक ब्याटिङ गर्दै ३६ बलमा ५९ रन प्रहार गरे । उनले ४ चौका र ४ छक्का प्रहार गरेका थिए ।