लस-एन्जलस। अवैतनिक वाणिज्यदुत ऋषि पुनाखर ढकालको पहलमा सान फ्रान्सिस्को स्थित नेपाली वाणिज्य दुतावासले दक्षिण क्यालिफोर्नियाका नेपालीहरुका आगामी साता नेपालमा व्यापार तथा लगानी अन्तरक्रिया कार्यक्रम र राहदानी शिविर संचालन गर्ने भएको छ।

अवैतनिक वाणिज्यदुत ऋषि पुनाखर ढकालका अनुसार मार्च २८ गते स्थानिय श्री पशुपतिनाथ बुद्ध मन्दिरमा राहदानी शिविर संचालन हुनेछ।

राहदानीको म्याद सकिएका र अधिकृत वारेसनामा लगायतको कागजातको सेवा आवस्यक भएका सेवाग्रहीलाई श्री पशुपतिनाथ बुद्ध मन्दिरमा संचलान हुने राहदानी शिविर अगावै अनलाइन मार्फत आफ्नो स्थान शुरक्षित गर्न सान फ्रान्सिस्को स्थित नेपाली वाणिज्य दुतावासले आग्रह गरेको छ ।

यसैगरी राहदानी शिविरमा राहदानी र अन्य कागजातको लागि डेबिट-क्रेडिट भुक्तानीको ब्यबस्था नरहेको हुँदा अमेरिकी हुलाक सेवाबाट लाग्ने शुल्क बराबरको मनी अर्डर र फिर्ती खाम सहित उपस्थित हुन सेवाग्रहीलाई आग्रह गरिएको छ ।

दुतावासका अनुसार नेपालमा व्यापार तथा लगानी अन्तरक्रिया कार्यक्रम २९ मार्च साँझ: ५:०० बजे देखि राति ९:०० बजेसम्म हनटिङ्ग्टन बीचस्थित हिमालयन ग्रिलमा आयोजना हुने र सहभागी हुन इच्छुक महानुभावहरुले पनि आफ्नो विवरण तल उल्लेखित लिंक मार्फत अनलाइन विवरण समावेस गर्नु पर्नेछ ।

अवैतनिक वाणिज्य दुत ऋषि पुनाखर ढकालले दक्षिण क्यालिफोर्नियाका सेवाग्रहीलाई नेपालमा व्यापार तथा लगानी अन्तरक्रिया कार्यक्रम र राहदानी शिविरमा हार्दिक आग्रह गरेका छन् ।