जनकपुर । जनमत पार्टीले मधेश प्रदेश सरकारलाई दिएको समर्थन फिर्ता लिएको छ ।

प्रदेश प्रमुखको कार्यालयले आज विज्ञप्ति जारी गर्दै नेपालको संविधानको धारा १६८ को उपधारा (२) बमोजिम गठन भएको वर्तमान सरकारलाई दिएको समर्थन जनमत पार्टीले वैशाख २२ गतेबाट फिर्ता लिएको जनाएको हो ।

जनमत पार्टीका संसदीय दलका नेता चन्दन कुमार सिंह सहित प्रदेश सभाका सदस्यहरुले हस्ताक्षर गरेर नेपाली काँग्रेसका संसदीय दलका नेता कृष्ण प्रसाद यादवको नेतृत्वमा बनेको सरकारलाई दिएको समर्थन फिर्ता लिएको औपचारिक पत्र प्रदेश प्रमुखको कार्यालयमा हिजो दर्ता गर्नुभएकाे थियो ।

मधेश प्रदेशमा नेपाली काँग्रेसका संसदीय दलका नेता कृष्ण प्रसाद यादवको नेतृत्वमा जनता समाजवादी पार्टी नेपाल, जनमत पार्टी, नेकपा माओवादी केन्द्र, लोकतान्त्रिक समाजवादी पार्टी नेपाल, नेकपा एकीकृत समाजवादी पार्टीको समर्थनमा सरकार बनेको थियो ।

सरकार निर्माणको क्रममा समर्थन दिएका राजनीतिक दलमध्ये कुनै एक दलले समर्थन फिर्ता लिए मुख्यमन्त्रीले ३० दिनभित्रमा प्रदेश सभाबाट विश्वासको मत लिनुपर्ने संवैधानिक व्यवस्था रहेको छ ।