म्याड्रिड । स्पेनको दक्षिणपूर्वी शहरमा शुक्रबार र शनिबार राति दक्षिणपन्थी समूहहरू, स्थानीय बासिन्दाहरू र आप्रवासीहरू बीच भएको हिंसात्मक झडपको क्रममा प्रहरीले आठ जनालाई पक्राउ गरेको अधिकारीहरूले सोमबार जानकारी दिएका छन्।

सुरुमा अज्ञात आक्रमणकारीहरूले एक वृद्ध बासिन्दालाई कुटपिट गरेपछि शनिबार राति मुर्सिया क्षेत्रको टोरे-पाचेकोमा झडप भएको थियो, जसको परिणामस्वरूप अति-दक्षिणपन्थी समूहहरूले यस क्षेत्रको ठूलो आप्रवासी समुदायमाथि बदला लिन आह्वान गरेका थिए।

सुरुमा आक्रमणको उद्देश्य स्पष्ट थिएन। स्थानीय सञ्चारमाध्यमले झडपमा पाँच जना घाइते भएको रिपोर्ट गरेको छ।

पक्राउ परेकाहरू दुई जना वृद्ध पुरुषमाथि भएको आक्रमणमा संलग्न रहेको आरोप छ र शनिबार राति भएको झडपको सम्बन्धमा धेरै मानिस संलग्न रहेको मुर्सियास्थित केन्द्रीय सरकारका प्रतिनिधि मारियोला ग्वेभाराले सोमबार सामाजिक संजाल एक्स मार्फत पुष्टि गरेकी छिन्।

आक्रमणमा भएको क्षति र सामाजिक सुरक्षा भंग गरेको आरोपमा छ जना स्पेनी र एक उत्तर अफ्रिकी नागरिकलाई हिरासतमा लिइएको ग्वेभाराले बताइन्। पक्राउ परेका अन्य दुई जनाले वृद्ध पुरुषमाथि आक्रमण गर्ने अपराधीलाई सहयोग गरेको उनले दावी गरेकी छिन् ।

लगभग ४२,००० जनसंख्या भएको टोरे-पाचेकोमा ठूलो संख्यामा प्रहरी तैनाथ गरिएको छ। स्थानीय सरकारी तथ्याङ्कका अनुसार यस क्षेत्रमा बसोबास गर्ने लगभग एक तिहाइ बासिन्दाहरू विदेशी मूलका छन्।

यस क्षेत्रका आप्रवासीहरू आस पासको क्षेत्रमा कृषि मजदुरको रूपमा काम गर्छन् । कृषि क्षेत्रीय अर्थतन्त्रको प्रमुख आधार हो।