न्युयोर्क । गैर आवासीय नेपाली संघ (एनआरएनए) अमेरिकाको नवनिर्वाचित अध्यक्ष सतेन्द्र शाहले संघीय पुनरावेदन अदालत क्यालिफोर्नियाले बुधबार ट्रम्प प्रशासनको पक्षमा फैसला गर्दै नेपालका अनुमानित ७,००० आप्रवासीहरूका लागि अस्थायी सुरक्षा कायम राख्ने टिपीएस सुबिधा अन्त्य गर्न संघिय सरकारलाई अनुमति दिएको खबरले संघको नवनिर्वाचित नेतृत्वको गम्भीर ध्यान आकृष्ट भएको बताएका छन् ।

अध्यक्ष सतेन्द्र शाहले एक विज्ञप्ति जारी गर्दै भनेका छन्, ‘गैर आवासीय नेपाली संघ (एनआरएनए) अमेरिकाको नवनिर्वाचित नेतृत्व आप्रवासी अधिकारका क्षेत्रमा क्रियाशील कानुन ब्याबसायीहरु र अधिकारकर्मीहरुसंगको परामर्श पछि हामि शिघ्र एउटा कार्यदल मार्फत कानुनी उपाएको खोजीमा लाग्ने प्रतिवद्धता व्यक्त गर्दछौ ।’

शाहले हिमालयन भ्वाइससंग कुरा गर्दै भनेका छन्, ‘नेपालको अस्थिर राजनीतिक अवस्था र भूगोलको प्राकृतिक प्रकोप झेल्न नसकेर अमेरिकी सपना देखेर आप्रवाशनको बाटो रोज्दै आएका नेपालका अनुमानित ७,००० आप्रवासीहरूलाई अमेरिकामा काम गर्ने र अमेरिकी सपना पुरा गर्ने अवसर प्रदान गर्ने अमेरिकी सरकार र अमेरिकी नीति भित्र यसलाई समेट्न हामि समानित राष्ट्रपति डोनाल्ड ट्रंप र अमेरिकी संघिय सरकारसंग आग्रह गर्दछौ ।’

‘अमेरिकी कानुनको पालना, राजनीतिक समर्थन, धैर्य र कानुनी बाटोबाट नेपालका अनुमानित ७,००० आप्रवासीहरूका लागि अस्थायी सुरक्षा कायम राख्ने टिपीएस सुबिधाको निरन्तरताका लागि एनआरएनए अमेरिका यथा संभव तपाइहरुको साथमा रहने प्रतिवद्धता व्यक्त गर्दछौ’ शाहले भनेका छन् ।