काठमाडौं। चलचित्र बिकास बोर्डले सोमबार एक विशेष समारोहको आयोजना गरी १५ जना सिनेकर्मीहरूलाई “सांस्कृतिक रूपान्तरण पुरस्कार” प्रदान गरेको छ । पुरस्कृतमध्ये बरिष्ठ अभिनेता शिव श्रेष्ठ, निर्माता–निर्देशक युवराज लामासहित ५ जना व्यक्तित्वहरू आदिवासी जनजाति समुदायबाट रहनुभएको छ ।
संविधान दिवसको अवसरमा चलचित्र विकास बोर्डले नेपाली चलचित्र क्षेत्रको सामाजिक तथा सांस्कृतिक रूपान्तरणमा योगदान गरे वापत ती कलाकर्मीहरूलाई पुरस्कृत गरिएको बोर्डका कार्यकारी अध्यक्ष दिनेश डिसीले बताउनुभयो । समारोहको प्रमुख अतिथि सञ्चार तथा सूचना प्रविधिमन्त्री जगदिश खरेलले नगद २० हजार रुपियाँसहित सम्मानपत्र प्रदान गर्नुभयो ।
मन्त्री खरेलले नेपालको सामाजिक-सांस्कृतिक पहिचानको अभियानलाई विश्वव्यापी बनाउन सिनेमा प्रभावकारी माध्यम हुने विश्वास व्यक्त गर्नुभयो । उहाँले दिनेश डिसीको सिर्जनात्मक नेतृत्व क्षमताका कारण समग्र सिने क्षेत्रको विकासमा सरकारले सकारात्मक परिणाम आउने अपेक्षा गरेको सुनाउनुभयो।
सो अवसरमा कलाकारहरु शिव श्रेष्ठ, सबिता गुरुङ, तीर्थ थापा, यसकुमार, ध्रुव लम्साल, रम्यता लिम्बू, सम्झना रौनियार, युवराज लामा, हेमन्त बुढाथोकी, किशन पोखरेल, केशव भट्टराई, नाजिर हुसेन, रिमेश अधिकारी, रेनीश फागो, अन्जु पन्त रहनुभएको छ ।
