पर्सा । मधेश प्रदेश अहिले खडेरीको चपेटामा परेको छ। धान रोप्ने समयमा वर्षा नभएपछि अहिलेसम्म खेती हुन सकेको छैन भने कतिपय स्थानमा खाने पानीको चरम अभाव देखिएको छ।
अहिले विशेष गरी वीरगन्ज महानगरपालिकाको ३२ वटै वडामा खाने पानीको चरम अभाव देखिएको छ। नगरको १९ नम्बर वडाको विन्ध्यवासिनी टोल, २४ वडाको रामगडुवा नयाँबस्तीमा खानेपानीको चरम अभाव देखिएको छ।
सो क्षेत्रमा खानेपानीको अभाव देखिएसँगै नेपाली सेना, स्थानीय सरकार तथा खानेपानी संस्थानले पानी वितरण गर्दै आएका छन्।
नेपाली सेनाको मध्य पूर्वी पृतना हेडक्वाटरको २८ बाहिनी अन्तर्गत श्री श्रीजङ्ग गणले दैनिक तीन चरणमा ६ वटा दमकलमार्फत् पानी वितरण गर्दै आएको छ। हरेक दिन सेनाले ९० हजार लिटर पानी वितरण गणपति प्रमुख सेनानी लोकेन्द्र कार्कीले जानकारी दिनुभयो।
मधेशमा खडेरीको मार परेपछि सरकारले सुक्खाग्रस्त क्षेत्र घोषणा गरेको छ।
