-कृष्ण बाउसे
फुटेको घन्टीको लयमा
लडखडाउँदै बगिरहेका
प्लास्टिकका थोत्रा झोला
र कुच्चिएका बोतलको
चीत्कारले विचलित नबनी
उषाले बिनाभेदभाव
भूगोललाई चुमेको देखेर
प्रदूषित पानीमै पनि
मुस्काउँदै छिन् शुक्लपक्षकी जून ।
दुई किनारका पर्खालको चेपमा
मुस्किलले सास फेरिरहेको
धोबीखोलाको कुहिरोभित्र
दुनियाँ ब्युँझनुअघि नै
उभिएको छ एउटा बकुल्लो ।
नवजात सूर्यको नयनमा जस्तै
उसको मनमा पनि छ आशाको बिस्कुन
नभए पनि खोलामा माछा ।
अचेल बस्तीहरूबाट
पानीको सट्टा
विषादी बग्छ भनेर
कसैले नपारिदिनू बकुल्लाको कानमा ।
आशाको डोरी चुँडिएर
जो पछारिए पनि
आखिर
ब्रह्माण्डको अंश नै खस्ने हो समयको पिँधमा ।
