काठमाडौं । नेपाली कांग्रेसको विशेष महाधिवेशन पक्षधर युवाको भेलाले पार्टीमा रूपान्तरण आवश्यक परेको निष्कर्ष निकाल्दै तत्काल विशेष महाधिवेशन आह्वान गर्न नेतृत्वलाई आग्रह गरेको छ।

काठमाडौँमा शुक्रबार सम्पन्न भेलामा सहभागी युवा नेता तथा भ्रातृ–शुभेच्छुक संगठनका प्रतिनिधिहरूले मंसिरमै १५औँ महाधिवेशन सम्पन्न गर्न नसकेमा विशेष महाधिवेशनमार्फत पार्टीलाई रूपान्तरण गरी आगामी निर्वाचनतर्फ अघि बढ्नुपर्नेमा जोड दिए।

भेलाले केन्द्रीय कार्य समितिलाई विशेष महाधिवेशनसम्बन्धी निर्णय शीघ्र ल्याउन आग्रह गर्दै वर्तमान नेतृत्वमा परिवर्तन नगरी निर्वाचनमा गए कांग्रेसलाई थप क्षति पुग्ने चेतावनी दिएको छ।

वक्ता करुणा कटुवाल, पुनम लामा, सचिन तिमिल्सिना, मोती भण्डारीलगायतले पार्टीको पुनर्संरचनाका लागि विशेष महाधिवेशन अपरिहार्य रहेको धारणा राखे।