काठमाडौं । पूर्व मन्त्री एवं एमाले उपाध्यक्ष सुरेन्द्र पाण्डेले नेपालको संविधानले कोही पनि व्यक्तिलाई पार्टीमा निषेध नगरेकाले कुनै पार्टीले रोक्न नमिल्ने बताएका छन ।

आज (सोमबार) काठमाण्डूमा आयोजित ‘एमालेमा आन्तरिक लोकतन्त्र’ विषयक अन्तर–संवाद कार्यक्रममा बोल्दै एमाले उपाध्यक्ष यस्तो बताएका हुने । उनले पूर्वराष्ट्रपति विद्या भण्डारीलाई पनि कुनै पार्टीको सदस्य नहुन भनेर संविधानले कतै बन्देज नलगाएको बताएका छन ।

उपाध्यक्ष पाण्डेले भने, ‘राष्ट्रपतिलाई पनि पार्टीको सदस्य नहुनु भनेको छैन, ‘संविधानले ३ वटा अवस्थाको मात्रै चर्चा गरेको छ ।’ संविधानको त्यो व्यवस्था अनुसार निर्वाचित भएको पद, मनोनीत भएको पद र नियुक्ति भएको पद राष्ट्रपति भएपछि स्वतः जाने र त्यो बाहेक अरू कुनै व्यवस्था नरहेको पाण्डेको भनाइ छ ।

उनले भने, ‘संविधानले नगरेको कुरा कुनै एउटा पार्टीले विधान बनाएर रोक्न मिल्छ र ?’, प्रश्न गर्दै पाण्डेले भने– ‘निर्णय गरेर रोक्न मिल्छ र ?’ यस्ता विषयहरूमा प्रजातान्त्रिक अधिकारलाई उल्लङ्घन गर्ने कुनै पनि प्रजातान्त्रिक पार्टीले गर्न नमिल्ने पाण्डेले बताए ।

उनले सदस्य हुने वित्तिकै पार्टी अध्यक्ष भइहाल्ने भन्ने नहुने भन्दै अध्यक्ष हुने प्रक्रिया फरक रहेकाले सदस्यबाट रोक्न नमिल्ने भएकाले विधान महाधिवेशनमा उठाउने बताए ।