काठमाडौँ । एनबिएम पोखरा गर्ल्स एफसीमाथि ६–१ को सानदार जित हासिल गर्दै सङ्कटा क्लब एन्फा राष्ट्रिय महिला लिगका लागि छनोट भएको छ ।

छनोट प्रतियोगिताको समूह ‘बी’मा रहेको सङ्कटाको यो लगातार पाँचौँ जित हो । जितसँगै समूहको शीर्ष स्थानमा रहँदै सङ्कटा राष्ट्रिय लिगका लागि छनोट हुने पहिलो टोली बनेको हो ।

सङ्कटाको जितमा स्ट्राइकर पूर्णिमा राईले ह्याट्रिक गोल गरिन् । त्यस्तै अट्याकिङ मिडफिल्डर सेनु परियारको नाममा दुई गोल रह्यो । एक गोल सङ्कटाले आत्मघाती उपहार प्राप्त गर्‍यो ।

छनोट प्रतियोगितामा सहभागी १४ टोलीलाई दुई समूहमा विभाजन गरिएको छ । सिङ्गल राउन्ड रोविन पद्धतिको प्रतिस्पर्धापछि प्रत्येक समूहको शीर्ष दुईमा अटाउने टोली राष्ट्रिय लिगमा छनोट हुने सेट–अप छ ।

सङ्कटाले आफ्नो अन्तिम खेलमा शनिवार न्यु रोड टिम (एनआरटी)को सामना गर्नेछ ।